L Purmeiro Libro de Bersos

Pregúntan-me quien será
L ambersador Fonso Roixo.
You respondo: Sei alhá?
Mas cumo inda mais que un coixo

Bien s’agarra un mintiroso,
Lougo debrebe acrecento,
Antre sério i melindroso:
Ye un almanecha q’andrento

An beç de tripas ten bersos.
I dá-me cabo de l caco
Anquanto ls bersos q’ancemba
Lougo al papel nun le saco.

L sendinés mais anti(g)o
Chamában-le Fonso Roixo.
Quien nun sabe donde bieno
Ye cumo se fura coixo.

Na bielha Grécia, ls sabidos
sacában filosofie
anquanto íban de camino:
eiqui you deixo la mie.

Ye boubo quien faç poemas,
quien nun ls faç mais boubo ye:
se stamos mal cun poetas,
sien poetas que serie…