Lucrécia Cunta-mos como Era

Alcina Pires naciu a 5 de Janeiro de 1953, an Malhadas, cunceilho de Miranda de l Douro. Zde tienra eidade bibiu an Zenízio, adonde fizo la scuola purmária, ajudando ls pais nas lhidas caseiras, ne l campo i a ser buieira, ende mamando i falando la lhéngua mirandesa. Solo als 14 anhos saliu para Bergáncia, a studar, cuncluindo an 1975 l curso de l magistério purmário. Assi que acabou l curso, scapou-se a eisercer pa l çtrito de Abeiro, i trés anhos apuis fui-se para Lisboua, adonde inda bibe. Pul camino, dedicou-se tamien a la pintura, tenendo feito alguas sposiçones.

La fuorte ligaçon que siempre tubo a la lhéngua mirandesa, lhebou a que zde mui cedo tamien la ampeçasse a screbir, lhougo apuis la sue oufecializaçon. Hoije, ten testos an bloges de lhéngua mirandesa i, subretodo, ne l Jornal Nordeste, l mais deilhes subre Zenízio, sues gientes, tradiçones i cultura.