Nuobas Fábulas Mirandesas

Faustino Ramos Anton naciu l 25 de Júlio de 1949, an Zenízio, cunceilho de Miranda de l Douro. Eiqui fizo la scuola purmária i bibiu até als 16 anhos, de todo fazendo na lhida de l campo, zde buieiro a pastor i lhabrador. Cun 16 anhos eimigrou, a salto, para Oubiedo, Stúrias, Spanha, adonde fizo de pinche nua presa i de lhagareiro nun lhagar de sidra. Als 17 anhos fui de beluntairo pa la Marina. A trabalhar, fizo l curso cumplementar de ls liceus. Stá hoije reformado i l nieto Afonso i la sue percipal acupaçon. Bibe ne l cunceilho de l Seixal, fraguesie de Corroios. Habendo deixado de poder falar la sue lhéngua, a eilha tornou i daprendiu a screbi-la hai pouco tiempo, nunca mais parando. Hoije ten testos spalhados por bárias publicaçones i blogues, an special ne l Jornal Nordeste (Bragança, an www.frolesmirandesas.blogspot.com i www.nialdelaboubielha.org. Stá repersentado na antologie A Terra de Duas Línguas, IPB / Associação das Universidades Portuguesas / Academia de Letras de Trás-os-Montes, Bragança (cordenaçon de Ernesto Rodrigues i de Amadeu Ferreira, este na parte mirandesa). La sue perduçon lhiteraira stá ne l Belume I de la Bibliografia do Distrito de Bragança – Série Escritores, Jornalistas, Artistas, de Hirondino da Paixão Fernandes (Câmara Municipal de Bragança, pp. 561-564).